‘Smart City hnuaia Khelmual siam-te tling lo lutuka ruahman a ni hi a pawi ka ti’ – Sport Minister, Lalnghinglova Hmar.

Sports Minister Lalnghinglova Hmar chuan tun hnaia Smart City Project hnuaia Football Khelmual siamte chu Pawisa hlawm lian si a, tling lo lutuk ruahman a ni chu pawi a tih thu House a hrilh.

Vawiina Assembly House-a Siaha bialtu K Beichhua’n Tho-Sai khelmual siam mek chungchang, UD&PA Minister K Sapdanga a zawhna chu Pu K Sapdanga’n Phullem phah chin chu Football khelhna tura pawm chin a tling pha lo niin a sawi a, hemi chungchang hi Sports Minister Lalnghinglova Hmar chuan sawifiahin Football khelmual len zawng International-a tehnaa a te ber chu metre avang metre 45 leh a dung Metre 90 leh a len lamah Metre 90 leh 120 pawm a nih thu sawiin inkhelhna tlangpui chu Metre 105 leh Metre 68 a nih thu a sawi a, tuna Tho-sai khelmual chu mi 9 field aia a tet thu a sawi a. Sports Minister chuan Tun hnaia Smart City project hnuaia Aizawla khelmual siamte an tlawhkualnaah Metre 105 leh Metre 68 tling pakhat a awm tih loh chu a zim ta lutuk vek tih a sawi a, Cheng Vbch 20 chuang daha pawisa thahnem tak dah si-a khelmual te leh lutukte chu siam rem dan a awm em tih UD&PA Minister leh Smart City hotute leh contractor-te nen inrawn in an en a, Zemabawk, Tuivamit, Edenthar leh Chite a mite chu a lo tling lo zel tih a sawi a, a then chu a hmunin a zir loh avangte a ni a, theihtawpa tih zauh leh tumin an indawr a, an nawr zau zel niin a sawi bawk.

Lalnghinglova Hmar chuan Mizoram chu tlangram a nih avangin a vaiin a tehna tling vek thei lo mah se, a tlin theihna hmunah chuan sum tam tak senga sorkarin a ruahman a nih chuan FIFA duhthusam anga zau Metre 105 leh 68 chu tlin tir zel tha a tih thu a sawi a, Pawisa hlawm lian si a, a tling lo lutuk ruahman a ni chu pawi a tih thu sawiin a theih ang anga nawr mek a nih thu a sawi bawk.