Er. H Ginzalala MLA, Adviser to Chief Minister chuan Central Ministry hrang hrang hotu liante dawrin Mizoram mamawhte a sawipui
Champhai North Bialtu MLA Er. H Ginzalala Adviser to Chief Minister Delhi zin chuan Mizoram mamawh leh kawng hrang hranga hmasawnna a awm theih nan Irrigation leh Fisheries Ministries lama thuneitu sangte kawmin Mizoram mamawh hrang hrangte a sawipui a, Sangha thar chhuah a nih theihna tur leh tuilak dan ruahmanna tha-te sawi dunin, Agriculture leh Horticulture lama eizawngtute tan hmasawnna tluantling a awm theih nana theihtawp an chhuahpui tur thu an sawi a,DPR-te siam a, an theih ang ang bawhzuia an lo tihhlawhtlinsak tur thu MLA hi an lo hrilh bawk.
Er. H Ginzalala hian a zirchhuahna Delhi Technological University tlawh nghalin, University Vice Chancellor Prof. Prateek Sharma leh University hotute chuan Agriculture, Health Sector, Education, Urban Mobility leh Artificial Intelligence lamah Mizoram Sawrkar nena thawhho theih nise an ti a, an theihna zawnah Central hotute berawn chung leh thawk ho tura hmalakpui an tum thu an lo hrilh a ni.
MLA hian Delhi-a a cham chhungin Manipur leh Mizoram inkalpawhna ber National Highway NH-102 B chu chak zawk leh tha zawka kalpui a nih theih nan Ministry-a thuneitu sangte a kawm bakah, NHIDCL Chief Managing Director hmuin chak zawka hmalak a nih theih nan theihtawp chhuahpui turin a ngen nghal bawk a ni.
Er. H Ginzalala hian Manipur-a Zohnahthlak hnam Peng hrang hrang hotute leh Prominent citizen-te nen inkawmin in-unauna tha zawk a awm zel theih nan hmalak ho zel dan turte an sawi ho a, Lawmpuina leh Chawimawina Thilpek hlutak MLA hnenahan hlan a, Zohnahthlak hnamte thawhhona kawngah an thlamuanpui takzet thu an lo hrilh bawk.
