‘ZMP-in Valupa Council thu an zawm loh dante ngaihtuahin an kal dik a rinawm lem loh’ – Lal Thanzara
Congress Party Sr. Vice President Lal Thanzara chuan ZPM sawrkarin kal dik an tum hle laiin hun kal tawhah Valupa Council thu an zawm loh dante ngaihtuahin an kal dik a rinawm lem loh niin a sawi.
Vawiin khan Congress party chuan Friday Political Session an hmang a, he hunah hian Lal Thanzara, Sr. Vice President, MPCC chuan thu sawiin, “ZPM ten MLA thahnem tak neiin rorelna an chang a, mipui in enchhin an duh a, tunah hian enchhin chhoh mek an nih avangin Congress party mi leh sa te pawhinn he enchhinna hi hmang tangkai tur se a duh thu a sawi a, an sawrkar loh avanga zam mai lo a, hmalam pan nana hmang turin an party mite a fuih bawk a ni.
Lal Thanzara chuan “ZPM sawrkarin kal dik an tum hle laiin hun kal tawhah Valupa Council thu an zawm loh dan te ngaihtuahin an kal dik a rinawm lemloh ni-a sawiin Inthlanah khan BJP pawisa an hmang tih te sawi a awm a, an hman leh hman loh chu hriat chhoh zel a ni dawn avangin an kal dan hi ngun takin an thlir zel dawn niin a sawi bawk.
Lal Thanzara chuan Politic hi tihfuh tum tan ni lo, ram leh hnam vei mite tana khelh chi a nih thu sawiin Tihfuh tum te chu party hrang hrangah an zuang lawr dun dun a, ram leh hnam tan an chhenfakawm loh niin a sawi a, Congress Party chu Mizoram tana rohlu tam tak dintu an nih thu sawiin Hydel Project tam tak an din te, Lengpui Airport an siam a, Medical College thlengin an din a, mi hian an hre duh anih chuan hmasawnna tam tak an thlen niin a sawi a; Lunglei kawng, World Bank kawng te, NLUP hmanga hlawhtlinna tam tak awm te chu Congress sawrkarin a thlen a ni a, Sairang thlenga Rail lo lut tur te, Border Trade Center siam mek te chu Congress sawrkar hnuaia hmalakna a ni a, Khelmual tha kan din te, Indoor Stadium te pawh an din a, thalai ten an hmang tangkai niin a sawi bawk.
He hun hi Benjamin Thansanga, General Secretary in a kaihruai a, Lalrindika Ralte, Ex-MLA, MPCC General Secretary ni bawkin thu a sawi bawk a ni.
