Police Check Gate-a pawisa khawna puh Police Officer pahnih suspend an ni a, mi dang 6 sawn an ni a; Home Minister chuan hetianga hremna lek hi ngai tawh lo se a duh thu leh khawng taka an kal zel tur thu a sawi.
Vairengte police Checkgate-ah hian January ni 5, 2023-a duty-te’n hnam dang truck driver hnen atangin pawisa an la ni-a hriat a ni a, hemi nia duty Sub Inspector C Vanlalnghakmawia leh ASI Mary Zosangpuii te chu suspend an ni a, Constable paruk te District dangah sawn an ni bawk.
Police suspend leh sawn takte puh an nihna hi a dik ngei em tih chhui chian a ni dawn a, suspend belh ngai an awm em tih pawh chhui zui nghal a ni dawn bawk a ni.
Hemi chungchangah hian Home Minister Pu K Sapdanga chuan Rule of Law a nihna anga hmang tur chuan reward & Puninshment mechanism pawh a chak tel a ngai tih sawiin thawk thate ngaihhlutna leh thil dik lo titute hremna a awm tel a ngai tih a sawi a, Sorkar hnathawkte chep taka siam an tum loh thu sawiin danin a phal chhungah zalen taka hnathawk thei tura siam chu an duh ber a nih thu a sawi a, hetianga hremna lek hi ngai tawh lo se a duh thu a sawi a, khawng taka kal an tum thu leh an kal zel tur thu a sawi bawk.
Home Minister chuan ram leh mipuite tana theihtawp chhuah chu an bat a nih thu sawiin ramin a that phahna tur a nih dawn chuan tih hreh an nei dawn lo tih a sawi bawk.
January ni 4 khan Home Secretary Pu H Lalengmawia chuan office memorandum tichhuakin Police checkgate-a danin a phut ni lo pawisa khawn leh pawisate la -te report-na tur a tarlang a, Vairengte, Zokhawthar, Kanhmun, Medillichera, Champhai Khankawn, Saiphai, Phaisen, Bairabi leh New Kawnpui-a duty t’en danin a phut bak pawisa an khawn thin tih hriat a nih thu a larlang bawk a, hei hi Mizoram sorkarin a pawm thei lo a, hetiang ti thinte chu sim nghal turin a lo hriattir tawh a ni.
