Tun hnaia sahimna zawnga Mizoram-a lo tlanchhia Myanmar sipai 104 chu nimin khan thawn kir an ni a, heng mite nen hian Mizorama tlanchhia Myanmar sipai 359 thawn kir an ni tawh.
Nimin-a thawn haw tak Myanmar sipai te hi Thawhlehni khan mipui sipai nen an inbeih hnuah sahimna zawngin Siaha District-a Lungpuk khuaah an lo tlanchhia a. India leh Myanmar inrina-a ramri vengtu Assam Rifles kutah an inpe a ni. Heng Myanmar sipai 104 te hi Aizawl panpui an nih hnuah vawiin khan Myanmar Sipai Sorkar-in Myanmar airforce cargo plane a lo tirh hmangin thawn haw an ni a. Sittwe lam panpui an ni.
Tun tuma Myanmar sipai 104 thawn kir nen hian Mizorama sahimna zawnga Myanmar sipai lo lut tawh zawng zawng chu 359 an tling tawh a. Nikum November ni 13 khan Myanmar sipai lo lut 40 chu thawn kir an ni a, November ni 14-ah mi 5, ni 16-ah 29 leh November ni 29-ah mi 30 thawn kir niin, kumin January ni 2 khan Myanmar sipai 151 chu Lengpui Airport atanga thawn kir lo an ni tawh a ni.
