Council of Ministers thukhawmin dan lova Kuva ro phurh kual velna titawp tura hmalak an rel.

Council of Ministers thukhawm chuan Sawrkarin ni 100 chhunga tihtur (100 days programme)a duante, a thawktu department te hnathawh dan viltu tur Monitoring Committee an siam a, GAD chu Nodal Department-ah an dah a, Sawrkar kum thar (2024-25) budget-ah thlai thar leina turin Crore 150 dah an rel bawk a, Sawrkar kum thar budget (2024-25) ah Hand holding (Bana kaih) Policy atan Finance-ah budget dah a ni dawn bawk a ni.

The Mizoram Right to Public Services Act, 2015 chu awmze neia kalpui turin department tinte hmalakna nei nghal turin an ti a, Dan lova Kuva ro phurh kual velna titawp turin a tulna apiangah hmalak nghal te, Model Code of Conduct (MCC) nun hmaa work order tihchhuah tawh leh hnathawhna tur hmuna hna lo thawh tan tawh te chu an hnathawh lai chhunzawm phal sak an ni a. MCC nun tawh hnua hnathawh tante erawh chu stay an ni a; Work order nei/awm hmasa lova hna lo thawk tan te pawh stay tur a ni ang.

Council of Ministers thukhawma an ral danin Lengpui Airport chu Airport Authority of India hnena hlan turin hma lak a ni ang a. Zoram Medical College (ZMC) pawh central sawrkar kuta hlan tura hmalak a ni dawn a, Fertilizers dealers, an license dik lo taka hmangtute license titawp sak tura hmalak te, SEDP teacher te chu tun sawrkar kum kal mek March ni 31, 2024 thleng thawh chhunzawm tir remtih a ni a. Thla hnih chhungin thil pawimawh chin fel ngaite chin fel tur a ni. SEDP hnuaia Non-teaching staff te chu an hna tihtawp sak nghal an ni thung dawn a ni.

Resource Mobilization Department chu thiah a ni a, Empanelment of Consultancy Firms te chungchang Council of Ministers thutkhawm leh hmasa berah pharh tura dah a ni a, Department zawng zawng te chu sawrkar laipui kal tlanga hna an thawh mekte a pending issues, projects and proposals an neih zawng zawng te sawifiahna lehkha December ni 19 hmaa Planning & Programme Implementation Department a thehlut vek tura tih an ni bawk.

Council of Ministers thukhawma rel danin Sawrkar pisaa zu leh ruihhlo lam chi reng reng tih (consume) khap bur ni se, Sawrkar pisa te hi venhimna mumal tak siam a, fai taka enkawl tur a ni. CCTV te hman theiha awmtir tur a ni a; Biometric Attendance System department tinah hman tur a ni a, hei hi Secretariat-ah a bul tan tur a ni dawn a; Sawrkar hnathawkte mimal hna thawhtir khap a ni bawk a, Solar Panels department hrang hrangten an hman mek te chu tangkai lehzuala hman a nih theih nan Power & Electricity Department in a vil dawn a ni.