Vawiina Assembly thutkhawm ni thumnaah Champhai South bialtu MLA Lt. Col. Clement Lalhmingthanga’n Larsap thusawi chungchangah lawmthu sawina motion a put luh chu House-ah sawiho niin pawm a ni.
Lt. Col. Clement Lalhmingthanga chuan Larsapin Sorkar hmalakna pawimawh tur kawng sarih a chhawp chhuak chu lawmawm a tih thu sawiin Sorkar thar thlang chhuak tura mipuiin rilru fim tak an hmang nia a sawi chu fak tlak a tih thu a sawi a ni. Motion hi Member 31-in a an sawi ho a, Larsap thusawi hi an sawiho hnuah motion pu lut tu Lt. Col. Clement Lalhmingthanga chuan House chu pawmpui turin a dil a, House chuan lungrual takina pawm a ni.
Vawiin Assembly thutkhawm-ah hian Assembly House Dy Speaker atan chuhtu awm lovin Pu Lalfamkima thlan tlin a ni a; Nimin tlai dar 3:00 thleng khan hming pek luh theih hun hawn a ni a, Pu Lalfamkima, Kolasib bialtu MLA hi Pu H Ginzalala chuan a nominate-a, Pu Jeje Lalpekhlua’n a thlawp a ni. Nomination file mi dang an awm loh avangin chuhtu awmlovin Dy Speaker atan thlan tlin a nih thu Speaker-in a puang a, hemi hnu hian House leader Pu Lalduhoma leh Oppision Leader Pu Lalchhandama Ralte-te’n a Dy Speaker Pu Lalfamkima chu a thutna turah an hruai a ni.
Dy Speaker atana thlan tlin Pu Lalfamkima chuan Dy Speaker atana thlan tlin a ni chu lawm thu a sawi a, Dy Speaker a ni ang tih a ngaihtuah ngai lo tih sawiin House tana tangkai taka hma a lak theihna turin House member-te chu theihtawpa tawiawma finchhuah turin a sawm a ni.
Vawiin Assembly thutkhawm-ah hian MLA leh Minister lo ni tawh Pu Lalbiakzuala sunna hun hman a ni a,House Leader leh Chief Minister ni bawk Pu Lalduhoma’n a chanchin a sawi a ni.
