Vawiin khan Mizoram chhunga district hrang hrangah vote tla chhiar dan tur chungchangah training buatsaih a ni a; Champhai District-ah chuan Political Party Counting Agent-te, Candidate Agent-te leh chanchinbumite tan Champhai DC Conference Hall, Keifangtlang-ah Training buatsaih a ni.
Champhai District Election Officer Pu James Lalrinchhana, Champhai Bawrhsap chuan vote chhiar chu inthlan kalpuinaa a hmawr bawkna leh inthlan hlawhtlinna lan chhuahna a nih angin political party aiawhte leh media-te chu an mawhphurhna leh chanvo te chiang taka an hriat a tul thu sawiin Champhai District huamchhunga Assembly Constituency pathuma vote tlate chhiar turin inpuahchahna uluk leh felfai taka kalpui a nih thu a sawi a; Election Commission of India-in tih tur leh tih loh tur a bituk te fimkhur taka zawm theuh tur leh Counting Centre pawh a hun taka thleng kim ngei turin a ngen a ni. Champhai DEP chuan MLA Inthlanpui, 2023 neih mek chhunga Champhai District-a Media-te leh Political party aiawhte’n Sawrkar tha taka an tawiawma, an mawhphurhna te tlin taka an hlenchhuah avanga lawmthu sawiin, election process tluang taka zawhfel ngei anih theihnan theihtawp chhuah tlang chhunzawm turin kalkhawmte a sawm a ni.
Vawiin training program hi Champhai Election Officer Pu Benjamin Zalawma Ralte-in a kaihruai a. Pu Lalrinawma Khiangte, SDO (S) leh State Level Master Trainer ni bawk chuan Vote chhiar ni a Counting Agent te mawhphurhna hrang hrang a zirtir a, DIPRO Pi C. Lalremruati chuan Media te hriattur pawimawh a zirtir a, Champhai North RO Pu M Misaela leh East Tuipui RO Pu Lalrinawma te’n thu an sawi a, Champhai District chanchinbumite leh Politicial party hrang hrang aiawh Counting Agent-te an tel a ni.
Ruahman lawk dan chuan, MLA Inthlanpui 2023-a Champhai District chhunga Assembly Constituency pathuma vote tlate hi December ni 3, 2023 (Pathianni) zing dar 8:00 a?angin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni a. Zing dar 8:00 ah Postal Ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi Round 4 ah zawhfel tum a ni a. Counting Agent-te hi Counting table tin zawnah party tin aiawh an thu dawn a ni.
Counting Day atan hian Media te hman tur Media Centre pawh DC Office Ground Floor-ah ruahman fel tawh a ni a. A hmunah round tin result puanchhuah tur niin, hemi atan hian sound system bun fel tawh a ni a. Media te tana ECI in Authority Letter a tih chhuah chu vawiin khan sem chhuah nghal bawk niin, CCN Champhai Cable Network leh LCN Zokhawpui te chuan Inthlan result hi Live a tih chhuah an tum a ni.
