Tukin zing khan Siaha District-a Laki khuaa Assam Rifles awmnaah Burma sipai 30 te chu an ralthuam thahnem tak nen an inpe.
Heng sipai inpete hi Lailenpi, Chin State, Siaha District atanga hla vak lova awmte nia hriat a ni. Lailenpi-a sipai hmun hi CNA kaihhruainain mipui sipaite chuan an bei a, sipai lamah hian thi leh hliam an awm em tih hriat chian a ni lova. Mipui sipai lamah mi pahnih an thi niin thudawnna chuan a sawi a. Hei hi Maipawl chuan a hranpain kan nemnghet thei lo thung a. CNA hnuaia che chhuakte hi PDF leh a dangte nia hriat a ni.
Burma sipai inpete hi mi 30 an ni tih Siaha Police hnen atanga thudawn a ni a. Assam Rifles kutah inpein, engtin nge an tih dawn tih hriat a ni lo niin thudawnna chuan a sawi tel bawk a. A hmaa Champhai District-a Burma sipai tum hnih lo inpe tawhte ngaihtuahin, helicopter hmanga thiar chhuakin an ram panpui leh an nih a rinawm a. Engtikah nge tih tun dinhmunah a sawi theih loh bawk, a ti.
Chin State-a inkahna thleng avangin tun hi India rama Burma sipai an inpek tum thumna a ni ta a. Hemi hma hian Champhai District-a Zokhawthar leh Vaphai ah te an lo inpe tawh bawk. Mipui sipaite hian Chin state 75% vel an thunun tawh niin an sawi a, sipai awmna beiin ram an lak belh zel bawk a ni.
