Inthlan vuakveta an thil man atangin Mizoram hian hmarchhak state dangte tiamin India ram pumpui inthlanna felfai leh thianghlim neih dan tih a tichiang hle.
Cheng 8000 hi Aizawl leh district khawpuia concrete in chhawng 1 luah man tlanglawn pawl tak a ni a. Chhungkaw thla khat mamawh tlanglawn leina pawh a phuhru pha lo.
Mizorama bial awm zat, 40-a han semrual phei chuan bial tinin cheng 200 in an insem thei a. Thingpui dawrah eitur tuihnai deuh tum khat kan lei thei tawk ang tih tur a ni.
Hei hi kum 2023 Mizoram inthlan vuakveta pawisa fai an man a ni a. Tun hnaia India ram hmun dang inthlana an sum man nena khaikhin chuan man lo tluk vel an ni. Sum an mante hi vote leina tur leh therhlo atana hman te a ni tlangpui thin a. Pawisa fai man a tlem danah hian therhlo semah state dang aiin Mizoram kan fihlim viau tih tilangtua ngaih a ni.
Online transaction hmangin sum a inpek theih teh meuh mai. Mahse thingtlang zawk, bank leh internet service chhiatna te ngaihtuahin tel chuan online-a therhlo sem hi chutiangin a hluar phah chuang lem lovang tiin MPF lam chuan an sawi.
November thlaah India rama state 5 te kan inthlang a, Model Code of Conduct (MCC) hman tan atanga November thla tir thleng khan cheng vaibelchhe 953 hu thil chi hrang hrang an man a.
Chung zinga cheng vaibelchhe 36 hu chu Mizoramah man a ni a, a hniam ber kan ni nain mipui tam dan ngaihtuah chuan a sang viau. Inthlan hmasa, kum 2018 vuakveta cheng vaibelchhe 19 hu an man atanga ngaihtuah phei chuan a let deuhthawin a pung. Data atang hi chuan kan tam hmel fu mai. Mahse hei hian Mizoram dinhmun erawh a tilang chiang lem lo thung.
Ngun zawka en chuan inthlan kaihhnawihah hian therhlo leh a dang leng vak a tam lem lo tih a hriat theih. An man tam ber hi zu leh ruihhlo kaihhnawih a ni. Cheng vaibelchhe 36 atang hian cheng vaibelchhe 19 chu herion an man hlut zawng a ni a. Cheng vaibelchhe 4.287 chu meth niin poppy seed cheng nuai 57 hu te, cheng vaibelchhe 8.84 hu ram dang cigaratte leh cheng vaibelchhe 1.16 hu zu te a ni.
Ruihhlo hi tam tham tak takin an man kumtluan tih kan hre theuh a. Mizoram hi ruihhlo siam chhuahna hmunpui, Golden Triangle an tih mai, Myanmar, Thailand leh Laos te nen kan inhnaih hle a. Anni hi meth bikah phei chuan khawvela a siam chhuak nasa ber a ni tawh. Ruihhlo kalkawng pakhat kan nih avangin man a tam a. Myanmar ram a buai hnuah leh a kalkawng pakhat Manipur state an buai hnuah Mizoram atangin a lut nasa zual niin thuneitute chuan an sawi a.
Cheng vaibelchhe 33 hu an man hi tam tham angin lang mah se, nikuma an man nasat vanglai nena ngaihtuah chuan a tam vak lova. A luhna hmasa Champhai District-ah nikum khan thla khatah an man tam laiin cheng vaibelchhe 33 hi a han phak thuak a, thla hnihah phei chuan a khum var var tum a awm nual mai.
Ruihhlo man a tam lutuk hi, a tam tham deuh a nih loh phei chuan media pawhin an report tha peih tawh lo hial a. Inthlan vuakveta an thil man tam zawk hi thil thar a ni lem lova, Mizorama ruihhlo tamzia tilangtu erawh a ni thung. A rawn tlawhtute lah hi a buaithlak thei angreng. Hmanni deuhva Champhai District court-a a chungthu an relsak ruihhlo tawlhtu pakhat chu Myanmar-ah chuan missionary kha an ni deuh a! Anni lam hian a tawlh hi sualah a ngai tehchiam lo ni te pawhin a lang.
A bakah chuan inthlan kaihhnawiha therhlo leh phal lo thil dang hi man a awm lo tluk a ni a. Mizoram kaldan hi state dang pawhin mak an tih khawp a ni.
Kan rual deuhthawa inthlang state dang atangin en ta ila. Chhattisgarh-ah chuan fai leh thil dang cheng vaibelchhe 38.34 hu man tawh a. An man zingah hian pawisa fai cheng nuai 10.11, zu litre 31,000 vel, cheng nuai 90.87 man hu vel te, cheng nuai 14.82 man tlereuh leh lung hlu kg 184 a tel.
Kum 2018 inthlanah khan campaign hun chhung zawng khan cheng vaibelchhe 11.85 hu vel an man a.Kumin chhunga man zat hi inthlan hnuhnung ber aiin a let thum aia tam a ni tawh.
November 1 thleng khan Madhya Pradesh cheng vaibelchhe 226 chuang hu an man ve tawh bawk a.
Hetah hian pawisa fai cheng vaibelchhe 25 chuang te, zu cheng nuai 36.99 hu, ruihhlo cheng nuai 11.7, leh tlereuh cheng nuai 75.06 man a tel a ni.
Kum 2018 inthlanah khan an man zawng zawng hi cheng vaibelchhe 72.93 a ni a. Kum 2023-a tun thlenga man zat chu kum 2018-a man zat aiin a let thum zetin a tam zawk a ni.
Rajasthan-ah MCC kalpui a nih atang khan phal loh thil cheng vaibelchhe 214 vel man a ni tawh a. Pawisa fai cheng nuai 25, zu cheng nuai 20 hu, rangkachak cheng nuai 20, leh ruihhlo cheng nuai 60 a tel. Thil dang, petrol, diesel leh fertilizer te pawh hmuh chhuah a ni tawh bawk.
Kum 2018 inthlanah khan an man zawng zawng hi cheng vaibelchhe 65 a ni. Tun tumah hian a let thum vel zetin a pung tawh.
Telangana-ah November 2 thleng khan vaibelchhe 439 hu an man tawh a, pawisa fai cheng nuai 156, rangkachak, tangkarua leh dang kg 1,300 chuang, cheng vaibelchhe 165.2 man, zu cheng nuai 49.4, leh ganja cheng vaibelchhe 24.7 an hmuchhuak tawh a ni.
Kum 2018 khan inthlanpui neih tum khan cheng vaibelchhe 137 man a ni a, heng zingah hian cheng vaibelchhe 125 chu pawisa fai a tel a ni. Telangana-ah pawh hian kuminah a let thum aia tamin an man a pung.
India hmarchhakah February thla khan Nagaland, Meghalaya leh Tripura te an inthlang a. Inthlan hmain phal loh thil hmuh chhuah an nei nasain anni pawh an pung hle.
ECI thuchhuah chuan thil man a pun chhan chu enforcement agency-te thawhhona ṭha leh vilvenna uluk zawka kalpui vang a ni, a ti.
State pathuma an thil man hi cheng vaibelchhe 148 vel a ni a, a tam ber cheng vaibelchhe 85.76, 60% vel chu ruihhlo a ni a. A bakah chuan therhlo sem tur cheng vaibelchhe 34.39 hu te, pawisa fai cheng vaibelchhe 14.05 leh zu cheng vaibelchhe 9.31 te an man a.
Meghalaya-ah an man tam ber a, cheng vaibelchhe 63.98 hu niin, Tripura-ah cheng vaibelchhe 44.67 leh Nagaland-ah cheng vaibelchhe 39.19 a ni.
ECI thuchhuah chuan, “Hetiang State pathumte hi ramria awm an nih avangin ruihhlo luhka an ni a. A bak, zu leh a dang, voters te hip tumnaa lutte hi Election Commission a ngai thutakin ngaihtuahawm a ti hle, a ti.
State dang inthlang te nena han inkhaikhin hian therhlo lamah chuan Mizoram chu fihlim tak tih a tilang thei a. Cheng vaibelchhe 36 hu vel an man zawng zawng deuhthaw chu ruihhlo kaihhnawih vek a ni a, therhlo man tur a awm loh bakah pawisa fai cheng 8000 chiah an man a. Kumin kumtira hmarchhak state danga an pawisa fai man nena khaikhin ringawt pawhin Mizorama an man zat hi 0.005 vel chauh a ni.
