A fanu kum tling lo pawngsualtua puh Laltlanmawia chu Special Judge Pocso Act. Champhai chuan thiam loh a chantira a, kum 20 chhung Lung In tang turin a hrem.
(Hmeichhe naupang hi tunge a nih hriat theih a nih avangin thil thlenna hmun hi thup a ni.)
Court hmaa thu hrethute sawi danin Laltlanmawia hian a nupui hmasa nena an inthen hnuiin an fanu chu nupuiah a nei zui a, nupuia a neih zui tak a fanu hian a thih san a, a nupuiin a thihsan hnuah fanu an neih chu Laltlanmawia hian a awmpui zui a; kum 2022 March thla leh October thla chhung khan a fanu kum tling lo hi vawi eng emaw zat mipat hmeichhiatna a hmanpui a, a fanu hian a damloh avanga Damdawi ina a awm laiin amah buaipuitu a patea hnenah thil thlen dan a hrilh a, thil thlen dan hi Khawzawl District Child Welfare Committee beng a thlen hnuah CWC hian uluk taka na zir hnuah Khawzawl Police Station-ah thubuai an thehlut a, Khawzawl Police-in pawikhawihtua puh Laltanmawia hi an man zui ta a ni.
Hemi chungchang hi Court chuan rang takin a ngaihtuah zui nghal a, thu hretute thusawi a ngaihthlak atang leh thil tisualtua puh hi a exam-na atangin Laltlanmawia hian ama fanu hi vawi eng emaw zat mipat hmeichhiatna a hmanpui ngei tih finfiah niin Special Judge Pocso Act. Champhai Pu Sylvie Zomuanpuii Ralte chuan he thubuaiah hian thiam loh a chantir a, kum 20 chhung Lung in tang tur leh cheng Sing 1 chawi turin a hrem a, a pawisa chawi tur hi a pe tla thei lo a nih chuan thla 1 dang a tan belh leh dawn a ni.
Court chuan Child Welfare Committee-in mi khawngaihthlak leh tanpui ngaite a tanpui a, an dikna chanvo hailan-sak tura an hmalakna chu lawmawm a tih thu sawiin chhunzawm zel turin a ngen a, hetiang lama harsatna tawkte pawhin CWC panna chang hre turin mipuite a beisei bawk tih a sawi.
