Champhaiah Pneumonia a leng nasa a, District Hospital-ah Pneumonia avangin naupang 16 an thi tawh
Kumin chhungin Champhai District Hospital-ah Pneumonia vei naupang 700 dah luh tawh an ni a, Pneumonia avangin naupang 16 an thi tawh.
Champhai District Hospital-a thawktute atanga Maipawl thu dawn danin kumin hian Champhaiah Pneumonia vei naupang an tam hle a, Champhai district hosptial-a naupang damlo inentir zinga a tam ber chu pneumonia an ni a, Champhai district Hospital-a naupang ward-ah khum awl a awm tawh loh avangin vawiin lama damlo admit ngaite pawh Private Hospital-ah dah luh an ni a, District Hospital naupang ward-a damlo awm 18 zinga 16-te chu Pneumonia vei an ni. Vawiina OPD-a damlo inentir 50 zinga 25-te chu Pneumonia vei an ni bawk.
Kumin chhungin Champhai district Hospital-an naupang dam lo 1161 dah luh tawh niin an zinga 700 (60.29%) te chu Pneumonia vei an ni a, Pneumonia avanga naupang thi hi mi 16 an awm tling tawh a ni. Champhai District Hospital-a naupang doctor chuan Pneumonia vei an tam lutuk chu engnge a chhan hriat a har thu sawiin Hospital panpui loh Pneumonia eng emaw zat an awm a rin thu sawiin, hun rei tak mahni in lama inenkawl hnua damdawi in pan chauh eng emaw zat an awm thu a sawi a, Pneumonia vei zinga a tam zawk chu kum 5 hnuai lam an nih thu a sawi bawk.
