Nimin tlaia mi kut tuara thi ni ngeia hriat Hmingthanmawia, Hnahlan kutthlaktu chu Champhai Police-te’n an man.
Nimin tlai dar 3:00 vel khan Hmingthanmawia (38) chu a unaupa te inah hliam na tak tuarin hmuh a ni a, Hnahlan PHC panpui a nih laiin Hmingthanmawiah hi a hliam tuar lovin a thi zui a. A lu-ah hliam a neih avangin Champhai Police-te chhui zui nghalin Hmingthanmawia u, Tunsianmunga (40) mi chu rinhlelh niin man zui a ni a; Champhai Police-te hnenah Tunsianmunga hian a nau Hmingthanmawia hi a thah ngei a nih thu a puang tawh a. Tunsianmunga hian Hmingthanmawia hi a tukhumah bawngtuthlawhin a vua a, a chhuahsan zui niin a insawi.
Tunsianmunga hian tun hma lamin an unau hi an intibuai fo tawh tih sawiin niminah pawh Hmingthanmawia hi rui chungin a inah hian lutin chhuara chemte lain a inchawp a, a muhil zui tih sawiin a rawn harh leh hunah chemte hmangin kut a thlak ang tih a hlauh avangin bawngtuthlawhin a vaw ta mai niin a sawi bawk.
Tualthatu Tunsianmunga hi Champhai Police Station-ah tualthah thubuai siamsak niin vawiin khan Champhai District Court-ah hruai a nih hnuin Champhai Police Station-ah darkar 48 chhung kawl belh leh din a ni a; nunna chan ta Hmingthanmawia ruang hi nimin tlai khan Hnahlan PHC-ah postmortem niin vawiin khan vuiliam a ni.
