India central bank, Reserve Bank of India (RBI) chuan ram chhunga ATM hman man chu a tihsan a remti a, vawikhat hman hmanah Rs 21 thleng a ni dawn. ATM hman man thar hi kum 2022 January ni 1 atanga kenkawh tura tih a ni.
Dan tharah chuan thla khata ATM vawi 5 hman man chu a thlawn a ni dawn a, customer te account neihna bank ATM-ah a ni thung. Vawi 5 hnu lamah chuan hman apiangin Rs 20 zel chawi a ngai tawh ang. Account neih lohna ATM atanga pawisa lak chhuah chu khawpui lianah vawi thum thleng pawisa a awm dawn lova, khawpui lian ni lovah chuan vawi nga thleng a ni ve thung ang.
Tuna ATM hman man tihsan hi kum 7 hnua an tihsan lehna hmasa ber tur a ni a. Kum 2012 khan ATM hman man hi bithliah that niin, kum 2014-ah an ennawn a, kum 2022 ah tihsan a ni leh dawn ta.
Pawisa lak chhuahna atanga an tihsanna hi Rs 15 atangin Rs 17-ah a ni a. Pawisa lak chhuahna ni lovah Rs 5 ni thin chu Rs 6 a ni tawh dawn a. Kum 2022 January-ah he dan hi kenkawh tur ni mah se August thla atanga hman tan a nih beisei a ni thung.
Customer ngah ber State Bank of India (SBI) chuan ATM hman man hi Basic Savings Bank Deposit (BSBD) account neite-ah hman a ni dawn tih an sawi a. Pawisa lak chhuahna atan a thlawnin tum li a hman theih ang a, a bakah chuan Rs 15 leh GST chawi a ngai ang.
